ಕ್ಷೌರಿಕರ ಗಿಡ - Saloon Plant
ಮೆಗಾ ಸಿಟಿ ಬೆಂಗಳೂರಿನಲ್ಲಿ ನೀವು ಕ್ಷೌರ ಮಾಡಿಸಿ ಕೊಳ್ಳಲು ಕ್ಷೌರದಂಗಡಿಯನ್ನು ಹುಡುಕಿಕೊಂಡು ಹೊರಡುತ್ತೀರಿ. ಅಂಗಡಿಯ ಹೆಸರನ್ನು ಹುಡುಕಲು ಮೇಲೆ ಬೋರ್ಡ ನೋಡುತ್ತೀರಿ. ಬೋರ್ಡ ಹುಡುಕುವ ಅವಶ್ಯಕತೆಯಿಲ್ಲ. ಕೆಳಗೆ ನೆಲದಲ್ಲಿ ನಿಮ್ಮ ಕಾಲ ಬಳಿ ನೋಡಿ. ಒಂದು ಹಳೆಯ ಡಬ್ಬದಲ್ಲೋ ಕುಂಡದಲ್ಲೋ ಅದು ಬಿರಿಯುವಂತೆ ಒತ್ತಾಗಿ ಬೆಳೆದಿರುವ ಗಿಡವೊಂದರ ಹಿಳ್ಳೆಪಿಳ್ಳೆಗಳ ಸಮೂಹ ನಿಮಗೆ ಕಾಣುತ್ತದೆ.ಹಾಂ ಇದೇ ನೀವು ಹುಡುಕಿಕೊಂಡು ಹೋಗಿರುವ ಕ್ಷೌರದಂಗಡಿ. ನೀವು ಆಗಾಗ ಭೆಟ್ಟಿಯಿತ್ತು ನಿಮಗೆ ಪರಿಚಿತನಾಗಿರುವ ಇನ್ನೊಂದು ಕ್ಷೌರದಂಗಡಿಗೆ ಹೋಗಿ ನೋಡಿ. ಅಲ್ಲಿಯೂ ಇದೇ ಗಿಡವನ್ನು ಹಳೆ ಡಬ್ಬಿಯಲ್ಲಿ ಕಾಣುತ್ತೀರಿ. ಈ ಅಂಗಡಿಯ ಮಾಲಕನನ್ನೇ ಕೇಳಿ ಇದೇನು ಗಿಡ ?ಇದರ ಹೆಸರೇನು ? ಇಲ್ಲಿ ಯಾಕೆ ನೆಟ್ಟಿದ್ದೀರಿ? ಅಂತ. ಆತ 'ಹಿರಿಯರು ನೆಟ್ಟಿದ್ದರು. ನಾವು ನೆಟ್ಟಿದ್ದೇವೆ ನಮಗೆ ಇದರ ಹೆಸರು ಗೊತ್ತಿಲ್ಲ' ಅನ್ನುತ್ತಾರೆ [ಶ್ರಾದ್ಧದದಿನ ಬೆಕ್ಕನ್ನು ಕಟ್ಟಿಡುವ ಸಂಪ್ರದಾಯದ ನೆನಪು] 
ಕಫ ವಾಂತಿ ಮಾಡಿಸಲು ಕನರ್ಾಟಕದ ಜನಪದ ಮದ್ದಿನಲ್ಲಿ ಬಳಕೆಯಾಗುವ crinum
asiaticum ಎಂಬ ಸಸ್ಯಶಾಸ್ತ್ರೀಯ ಹೆಸರಿನಿಂದ ಗುರುತಿಸಲಾಗುವ ಮತ್ತು ಕರಾವಳಿಯಲ್ಲಿ ಪರಿಚಿತವಾಗಿರುವ ಇಸಮುಂಗಲಿಗಿಂತ ಇದು ತುಸು ಬೇರೆ Crinum
asiaticum, Linn ಈ ದ್ವಿನಾಮ ಗುಂಪಿಗೆ ಸೇರಿದ ಇಸ ಮುಂಗಲಿಯನ್ನು ಕಫ ವಾಂತಿ ಮಾಡಿಸಲು ಕರಾವಳಿಯ ಮನೆಮದ್ದು ಗಾರರು ಬಳಸುತ್ತಾರೆ. ಅನುಭವಿ ಜನಪದ ಮದ್ದುಗಾರರು ಎಲೆಯನ್ನು ಬಿಸಿಬೂದಿಯಲ್ಲಿ ಹುಗಿದು ಹಿಂಡಿ ರಸ ತೆಗೆದು ಎದೆಯಲ್ಲಿ ಕಫ ತುಂಬಿದ ಮಕ್ಕಳಿಗೆ ಕುಡಿಸುತ್ತಾರೆ.
ಇಸಮುಂಗಲಿ ಈ ಹೆಸರಿನಲ್ಲಿರುವ ಇಸ ಶಬ್ದವನ್ನು ಗಮನಿಸಿರಿ. ಇಸ ಎಂದರೆ ಕಹಿ. ಕಂಯ್ ಕಂಯ್ ಇಸಾ, ಎಂಬ ಕರಾವಳಿಯಲ್ಲಿ ಬಳಕೆಯಲ್ಲಿರುವ ಪಡೆ ನುಡಿಯನ್ನು ಇಲ್ಲಿ ಗಮನಿಸಬಹುದು . ಕಹಿರುಚಿಯ ಎಲೆ ಕಾಯಿ ಹಣ್ಣು ಗಳನ್ನು ಕುರಿತು ಬಯಲು ಸೀಮೆಯ ಜನ 'ಏ ಭಾಳ ಇಸಾ ಐತ್ರಿ ತಿನ್ಬೆಡ್ರಿ'.ಎನ್ನುವ ಮಾತನ್ನು ನೀವು ಕೇಳಿರುತ್ತೀರಿ.ಇಲ್ಲಿ ಇಸಾ ಇದರ ಅರ್ಥ ವಿಷವೆಂದಲ್ಲ. ಆದರೆ ಹಳೆಯ ಪುಸ್ತಕಗಳಲ್ಲಿ, ಅಂತರ್ಜಾಲ ದಾಖಲೆಗಳಲ್ಲಿ ಇದು Poison
bulb ಆದರೆ ಕ್ಷೌರಿಕರ ಅಂಗಡಿಯ ಮುಂದೆ ಕಾಣುವ Crinum ಗಿಡವನ್ನು ಮೇಲೆ ತಿಳಿಸಿದಂತೆ ಅಥವಾ ಬೇರೆ ಬಗೆಯಾಗಿ ಮನೆ ಮದ್ದನಲ್ಲಿ ಬಳಸಿರುವದು ತಿಳಿದು ಬಂದಿಲ್ಲ. ಇಸ ಮುಂಗಲಿಯ ಎಲೆ ದಟ್ಟ ಹಸಿರು, ಮತ್ತು ಅಗಲ. ಆದರೆ ಕ್ಷೌರಿಕರ ಅಂಗಡಿಯ ಮುಂದೆ ಕಾಣುವ Crinum ಗಿಡದ ಎಲೆಯು ಇಸಮುಂಗಲಿಯ ಎಲೆಯಂತಿಲ್ಲ. ಇದು ಸಪುರ. ಗಿಳಿಹಸುರು.. ಇದರ ಎಲೆಯ ಉದ್ದದ ಗುಂಟ ಉದ್ದದ ಬಿಳಿ ಹಸುರು ಬಣ್ಣ ಮಿಶ್ರಿತ ಗೆರೆಗಳು ಕಾಣುತ್ತವೆ.. ತುಂಬ ಮರಿಯೊಡೆದು ಬೆಳೆಯುವ ಗುಣ ಇದಕ್ಕಿದೆ.
ಈ ಗಿಡವನ್ನು ತಮ್ಮ ಅಂಗಡಿಯ ಮುಂದೆ ನೆಟ್ಟ ಈಗಿನವರಿಗೆ ಇದರ ವಿವರ ಗೊತ್ತಿಲ್ಲದಿದ್ದರೂ, ಹಳೆಯ ತಲೆಮಾರಿನ ಇವರ ಹಿರಿಯರು ಕಡಿದ ಗಾಯದಿಂದ ಒಸರುವ ರಕ್ತನಿಲ್ಲಿಸುವ ಇದರ ಅಮೂಲ್ಯ ಗುಣವನ್ನು ಅರಿತಿದ್ದಿರಬಹುದು. ಹಳೆಯ ತಲೆಮಾರಿನ ಇವರ ಹಿರಿಯರು ಹೊತ್ತಿಗೆ ಸರಿಯಾಗಿ ಇದು ಕೈಗೆ ಸಿಗಲಿ ಎಂಬ ಉದ್ದೇಶದಿಂದ ತಮ್ಮ ಅಂಗಡಿಯ ಅಂಗಳದಲ್ಲಿಇದನ್ನು ಪೋಷಿಸಿ ಕೊಂಡಿದ್ದರೆನ್ನಬಹುದು.ಆದರೆ ಟ್ಯೂಬುಗಳಲ್ಲಿ ರಕ್ತನಿರೋಧಕ, ಗಾಯ ಮಾಯಕ, ಮದ್ದುಗಳು ಆಧುನಿಕ ಔಷಧದಂಗಡಿಗಳಿಗೆ ಬಂದ ಮೇಲೆ ಈ ಗಿಡದ ಪ್ರಯೋಜನ ಮುಂದಿನವರಿಗೆ ಮರೆತು ಹೋಯಿತು. ಹೆಸರೂ ಮರೆಯಿತು.ಆದರೂ ತಮ್ಮ ಹಿರಿಯರ ಜ್ಞಾನದ ಆಸ್ತಿಯ ಕುರುಹಾಗಿ ಇವರು ಈ ಗಿಡವನ್ನು ದಕ್ಷಿಣ ಕನರ್ಾಟಕದ ಕ್ಷೌರಿಕರು ಉಳಿಸಿಕೊಂಡಿರುವದು ಮೆಚ್ಚುವಂತಹದ್ದು. ಕ್ಷೌರಿಕರು ತಮ್ಮ ಅಂಗಡಿಯ ಮುಂದೆ ರಕ್ಷಿಸಿ ಕೊಂಡಿರುವ ಕಾರಣ ಈ ಗಿಡವನ್ನು. ಕ್ಷೌರಿಕರಗಿಡವೆಂದು ನೆನಪಿಟ್ಟು ಕೊಂಡಿದ್ದೇನೆ. ಅನೇಕ ಅಲಂಕಾರಿಕ ಗಿಡ ಪ್ರಿಯರು ಇದನ್ನು ತಮ್ಮ ಹೂದೋಟಗಳಲ್ಲಿ ಬೆಳೆಸಿಕೊಂಡಿದ್ದಾರೆ. ಇದು ಔಷಧ ಗಿಡವೂ ಅಹುದು ಎಂದು ತಿಳಿದಾಗ ಔಷಧ ಗಿಡ ಪ್ರಿಯರು ತಮ್ಮ ಮನೆಯ ಕುಂಡದಲ್ಲಿ ಇದಕ್ಕೆ ಸ್ಥಾನ ನೀಡಿಯಾರು.ನೆಟ್ಟವರು ಇನ್ನಷ್ಟು ಮುತುವಜರ್ಿ ವಹಿಸಿ ಇದರ ಆರೈಕೆ ಮಾಡಿಯಾರು.
ಬೆಂಗಳೂರಿನ ಕ್ಷೌರಿಕರಂಗಡಿಯ ಅಂಗಳದಿಂದಲೆ ಒಂದು ಪಿಳ್ಳೆಯನ್ನು ತಂದು ನಮ್ಮ ಮನೆಯಂಗಳದಲ್ಲಿ ನೆಟ್ಟಿದ್ದೇನೆ.ತುಂಬ ಮರಿಯೊಡೆದಿದೆ.ಇನ್ನೂ ಹೂ ಬಿಟ್ಟಿಲ್ಲ. ಹೂ ಬಿಟ್ಟಾಗ ಬರೆಯುತ್ತೇನೆ.
No comments:
Post a Comment